جاري تحويلك...
إنجي... ملكة جمال مصر
سنة 1999.. فازت انجي عبد الله بجايزة ملكة جمال مصر... وبعدين شاركت في فيلم بدر.. بدور ملكة جمال الكون ... (بالمناسبة هي كانت رقم 26 في مسابقة جمال الكون).. الفيلم من بطولة وتأليف وإخراج يوسف منصور.. وانت قدام محاولة تمصير غشيمة لفيلم Bodyguard...
المهم يعني، مش مش موضوعنا ومش هنمسك في مين المنظمة اللي عايزة تموت ملكة جمال الكون في مصر.. بس خلينا في انجي عبد الله...
انجي من يوم ما وعيت وهي عايزة تبقى ممثلة... درست في كلية الإعلام.. اشتغلت موديل.. شاركت في مسابقة ملكة جمال مصر وبعدين عملت فيلم بدر.. الفيلم نزل السينما.. لكن هش متشهرتش غير بعد عرض الفيلم في التلفزيونات..
سنة 2007 ، رجعت للتمثيل تاني من خلال مسلسل «امرأة فوق العادة» ، ومسلسل «ساعة عصاري» من إخراج محمد حلمي وبعد 3 سنين مسلسل «اختفاء سعيد مهران» مع هشام سليم ودرة، من إخراج سعيد حامد.
بسبب الفيلم طلعت عليها شائعة انها اتجوزت من يوسف منصور، لكنها نفت دا تماما، واتجوزت واحد من خارج الوسط الفني، بكنهم اتطلقوا بعد سنة واحدة،
وعام 2015 اتجوزت ألبر بوسوتر، القائم بأعمال السفير التركي في القاهرة سابقًا، وسافرت معاه لمقر شغله الجديد في اليابان،
وفي عام 2016، أصيب بورم فى المخ والنخاع الشوكي، ودا اثر عليها جدا... المرض مش سرطان، لكنه يشكل خطورة بالغة بسبب موقعه، ودا خلاها فقدت الإحساس بجانبها الأيمن وصعوبة في البلع وآلام مستمرة...
الغريب ان جوزها اتخلي عنها في فترة مرضها، وراح اتجوز واحدة تانية، والاغرب انها عرفت بجوازه.. لما شافت صوره على فيس بوك..
وقالت: "أنا منفصلة من 2018 ورحلتي العلاجية الأولى 2019 كانت مع أهلي بس، هو ما كانش معايا، احنا اتطلقنا بعد ما اكتشفت المرض، ورحلتي العلاجية هو ما كانش موجود فيها، ورفض يساعدني، واتجوز واحدة تانية قبل ما نكمل سنة طلاق، وعمل فرح كبير وانا اكتشفت من صور الفرح اللي شفتها بالصدفة عند أصحاب مشتركين على فيسبوك، اتصدمت أكيد خصوصًا إني كنت في نص جلسات الإشعاع والكيماوي".
ورجعت مصر سنة 2019.. علشان تكمل رحلة علاجها.... الغريبة انها لما اتطلقت مضت عن ورق اتنازلت فيه عن كل حقوقها.. ربنا يشفيها.
#بهاء_حجازي